Open Monumentendag 2017 - gedichtenwedstrijd

In het kader van de Open Monumentendag 2017 heeft het Comité Open Monumentendag in de gemeente Aalten een gedichtenwedstrijd uitgeschreven in het Achterhoeks dialect. De winnaar van de gedichtenwedstrijd was Ina Brethouwer met haar gedicht ‘Mooders wasdraod’.

Mooders wasdraod

Daor zit ik now met mooder an de kökkentaofel.
Wi’j praot wat ovver naobers en andere leu wie’w kent
Schokkin, de Greute, Gandvort en d’n Blauwen.
’t Is neet gelieke verdeeld.
D’r bunt d’r dee wordt old, maor lange neet allemaole
en dan mo’j ‘t maor nemmen zoas ’t kump,
mèt blieven doon en ‘t toch allemaol belaeven.

Al zo lange laefden ze hier, op dizze Luutenboerderi’je
old en jong altied bi-j mekare
Acht leu ton’k jonk wazze, noo vieve nao vieftig jaor.
Uut-evloggen, uut de tied ekommen,
verjongd, verni’jd zoas dat geet.
’t Arf is läög zonder zönne en breur dizze leste twee jaor.

Buuten zee’k de zwaluwen, zee kwettert, duukt en scheert,
komt altied terugge, könt eur ei hier kwiet
bunt d’r al miene jaoren e-west
meugt nog lange blieven
schuurdeure los, stalraam zonder glas, elk jaor weer.

’t Grote peerd löp kalm verdan in de weide,
de pony bizzekt met ziene korte peutjes daor achteran.
Hier ston vrogger dat zwartgeteerde kippenhok met,
oh jao, daorveur den langen wasdraod, twee riegen breed.

“Wasgrei fatsoenlek ophangen, zorg en andacht mek alles lieke,
soort bi’j soort, wet i’j: ’t stök nogal nauw,
onderboksen achter de witte lakens!

’t Volk op de weg hoeft ’t kruus neet te zeen
dat wappert in de wind.

De lakens zwaait bli’j naor de zōnne
en de kruuze dreugt mooi op.

Ina Brethouwer

Afbeelding | Presentatie gedichtenwedstrijd
Ina Brethouwer draagt het winnende gedicht voor tijdens de Open Monumentendag 2017.
Afbeelding | Gedichtenwedstrijd